لبى { عيــونه } ولبى زولــه .. {الغــآلي } ..!

صبآحكم/مسآئكم جنائن الورد

يانزعة الواهس .. اللي ضيّقت بالي
يالله ياربي تكافي شر ... هالنزعه

/
\

انا اتصبّر وزاد ( الشوق ) غربالي
حتى استضاق الفضا بعيني على وِسعه

/
\
كني " عليلٍ" يشوف علاجه محالي
وفي كل لحظه يزود الحزن به جُرعه !
/
\
ماباقي الا "انفجر" واصيح بالغالي
واقول انا ميّت ان ماجيت هالجِمعه
/
\
ياوجد حالي عليك .. إلا بري حالي
من يوم قفّيت كن الروح { منّزعه }

/
\
كنت احسبني على "فرقاك" بحتالي
لكن عقب غيبتك ..ماانكفّت الدمعه
/
\

اصفح عن وجيه / حسادي وعذالي
اللي علي يفرحون ان شافو ..الهزعه
/
\

ودموع عيني ماطاحت يوم الاهوالي
يوم المصايب لراسي جات .. مرتبعه

/
\

مشتال حملي بفضل الله .. مشتالي
من طيب راسي ولاابغي من حدن فزعه

/
\
بس {الهوى} مايفرّق بين الازوالي
ولاحدٍ يعارض على سلمه ولاشرعه

/
\

والقلب نصفه "الاول" كنّه التالي
سهوم الهوى لااغزته ماهيب منردعه
/
\

وانا ذبحني [ غلا ] ذربين الافعالي
وزودٍ على حبهم لي عندهم .. طَمعَه

/
\

غرو ٍ خياله (يخاويني) ويبرى لي
اموت في شوفته.. واموت في سَمعه
/
\

[ لبى عيونه ..ولبى زوله الغالي ]
ولبيه كلّه .. ولبى جنسه وطبعه

/
\

شبعان {ذوق} وحلا وشوي متعالي
وبالملح والثقل ..ماهو قاصرٍ شَبعه

/
\

ذاك [ المحيّا ] متى بشوفه اقبالي؟
اللي به الحسن فتنه والحسن نَبعه !

/
\

ان طوّلت { غيبته } بموت طوّالي
قولو له : اخر وعد عصرية "الجمعه"

/
\

انااشهد ان المفارق ضيم واذلالي
راعيه ماعاد يطيق أهله ولا ربعه

/
\
معهم ! وكنّه لحاله في (الخلا الخالي)
غيبوبته .. تاخذه والناس مجتمعه
/
\